Drunken Revelations pt.2

“After the first glass, you see things as you wish they were. After the second, you see things as they are not. Finally, you see things as they really are, and that is the most horrible thing in the world.” - Oscar Wilde

Sabi nga nila pag nakainom nawawala ang mga inhibition mo… may mga di naman sumasayaw pero bigla na lang humahataw nang wala sa sarili… may mga sobrang seryoso sa buhay na bumabalik sa pagkabata at nagiging maharot at makulit… may mga tahimik na bigla na lang nagiging makwento. Minsan, nagiging makatotohanan din ang usapang lasing lalo na pag seryoso.

Di pa ako ganun kalasing nung panahon na yun para sabihin lahat, kahit na hmmm… iniisip ko kung mas maganda kung nasabi ko na din yun. Para may makaalam na kung sino talaga yung gusto ko “iprospect”(?) at mapilitan na akong may gawin…di yung ganitong puro overanalysis na naman ako at puro pagpapaliban…

Pero mabalik tayo sa usapan… napansin ko na sa lahat ng naging parte ng lovelife ko na umabot naman ng mutual understanding phase, e tila sinabotahe ko bago maging higit pa kaysa dun. Ayos na ang standing ko e, tapos para bang unti unti e natutulak ko sila palayo. May mga bagay akong ginagawa o di ginagawa at ang nangyayari lumalabo ang tsansa ko… tapos aayaw agad ako sa sandaling magmukhang malabo. Kesyo ayaw ko ipilit ang sarili ko sa ayaw sa akin o kung ano pang dahilan maisip ko.

Takot ba ako mag-commit? Hmmm. Napansin ko na baka nga totoo... Di lang ako takot ma-reject. Takot din ako pag nagtuloy-tuloy. At minsan pinipili ko pang mareject na lang. Naaalala ko inisip ko nun sa isa, “mukhang mas magiging masaya sya dun sa isa kaysa sa akin”. Anong gagawin ko kung sakaling kami na, dami-daming gagawin siguro, etc... Dun nga sya napunta sa isa, pero di na rin naman sila ngayon kaya siguro di rin sya ganun kasaya.

Baka nga naman di ko binigay lahat nung “nanliligaw” ako sa kanila. May mga bagay akong pwedeng gawin pero pinili kong hindi na lang. Baka sayang sa effort. Baka mauwi lang sa wala. Baka pumalpak. Alam ko mali, pero hmmm, minsan talaga iba ang alam mo sa ginagawa mo. Baka makapagbigay pa ako ng mabuting payo sa ibang tao pero mukhang ako mismo di ko kayang sundin ang payo ko.

Bakit ko ba sinasabi ito dito. Nagmumukha lang akong loser. Siguro gusto ko lang maupo at isipin ang mga ganitong bagay, lalo na wala naman akong kausap sa mga ganito. Maiisip ko lang kung ita-type ko o isusulat at matagal-tagal na rin akong di nagsusulat… Baka pag sinabi ko sa iba e kung ano pa isipin nila. Walangjo. Matanda na ako ganito pa din. Marami sa kilala ko may asawa na o kaya nasa long term relationship. Ako ni ha ni ho, wala pa. Hmmm.

Kailangan ko ba malasing ulit para malinawan?

Drunken Revelations pt.1

“I can honestly say that I was never affected by the question of the success of an undertaking. If I felt it was the right thing to do, I was for it regardless of the possible outcome” – Golda Meir

Dahil nitong mga huling buwan ay sobrang toxic sa trabaho at dahil na rin siguro napag-alaman na ng mga empleyado wala nang company outing this year dahil “maliit” lang daw kinita ng company (mga 100+ million dollars lang kasi), napagplanuhan mag-outing ng mga team lead sa amin. At dahil pangkat pinuno na rin ako, kasama na ako dun. Sa totoo lang nagkalimutan na kung kelan talaga ito, kaya nagulat na lang ako nung nakaraang Miyerkules nung nalaman ko na sa Sabado na pala. Tinamad na ako sumama nung una dahil balak ko din pumunta ng SM North nung sabado para tingnan yung mga sumali sa gunpla competition… pero dahil meron din akong, hmm, ulterior motive(?), e yung outing na lang ang pinili ko.

Masaya naman ang naging outing. May napuntahan kaming kainan na sa subic lang ata meron – yung Chowking este Xtremely Xpresso Café. Parang gastro dahil kain lang kami ng kain. Tapos marami napagkwentuhan at puro tawanan. Yun nga lang di na ako nakalusong sa dagat dahil pagkadating namin sa kwarto tulog agad ako (wala pang tulog dahil diretso ako galling night shift) pero sa pagkakaalala ko naman di rin naman ganun ka-espesyal ng beach sa part na yun. Kaya ok lang kahit di nakalublob

Nung gabi ng sabado, pagkatapos kumain sinimulan na naming ubusin ang naturingan tubig ng buhay. Akala ko nung una, kukulangin ang nabili dahil marami kami pero nung huli, mahina pala ang mga kalaban. Hehe. Walo lang kasi sa amin ang uminom, at madami ang maagang nalasing. Isang baso ang umiikot at isang baso para sa matatalo sa larong "jackass". Bale yung jackass ay isang drinking game kung saan may mga katumbas na gagawin ang bawat card sa isang deck. Kunyari, Ace ang nabunot, magbibigay ng category yung nakabunot tapos lahat magbibigay ng example. Ang walang maisip o magkamali o magsabi ng nasabi na, iinom. Tapos bubunot ng panibagong card yung susunod.

Nung naisipan ko na magkwento ng lovelife kong masalimuot, tatlo na lang kaming natira sa mesa. At habang nagkwkwento ako, nakatulog na rin yung isa. Habang kinukwento ko, napansin nung kausap ko na may pattern yung mga nangyari. Hmm. Di ko rin naisip yun, bukod sa karamihan ng pakikisalamuha ko ay hanggang mutual understanding lang umabot at tila nag-seself sabotage ako... sabi nya, hindi pa raw kami ng prospect ko e nagpapakita na raw ako ng bad side ko. Sabi ko naman hindi ko naman basta basta pinapakita yun. Pag napuno lang ang salop. Ganun lang talaga akong tao, hindi mo dapat pinupuno ang salop ko dahil mag-lalash out ako. Pakiramdam ko naman pasensyoso akong tao pero meron lang mga time na pag sunod sunod na yung ginawa mo at nagcountdown na ako sa sarili ko tapos tinuloy mo pa din gumawa ng di maganda sa akin, nagdidilim na ang mundo...

Obligatory Birthday Post

Birthday ko na naman. Nahuli lang ng konti si PNOY kaya di nya na-declare na holiday ngayon. Pero di bale, holiday naman kahapon para sa inyo. Walang anuman, Pilipinas.

3 hours ata kami sa presinto kahapon, parang hinuli na rin kami imbis na bumoto sa tagal ng proseso ng botohan. Buti na lang at gumagana yung PCOS sa cluster namin. Yung sa kabila kasi nag-iinarte. Ang init, para na rin akong nag-exercise sa tinagaktak kong pawis. Dapat may priority lane din kapag malapit na ang birthday. O kaya express lane kung konti lang iboboto mo, parang sa supermarket. 8 senators or less.

May mga binoto akong pasok sa pagka-senador sa huling bilang, meron ding hindi. Iniisip ko na lang, at least yung ibang ayaw ko di rin pasok sa magic 12. haay... marami pa rin talagang hindi informed na Pilipino, ang masakit, mas marami sila sa mga informed. Hindi magandang pangitain para sa susunod na halalan.

Pero teka, araw ko ngayon kaya tama na ang tungkol sa kanila...

Salamat sa Facebook at maraming nakaalala at bumati. Hehe. Nasa 30+ na ata sila. Salamat.

Lahat ng na-wish ko nung 2007, nakuha ko naman na at lampas pa kaya masaya ako pag naalala ko. Akalain mo. Kung magka-time machine lang ako, sasabihan ko yung 21 year old na ako at sasabihin kong makukuha mo din yang mga yan. Magkakatrabaho ka rin kahit akala mo sa mga panahon na yan e bagsakin ka at wala nang kukuha sayo. Magiging ok rin ang lahat kahit paano.

Kung magkatimemachine sana yung 28 year old na ako at balikan ako ngayon. Sana sabihin naman nya, "di mo aakalain pero magkaka-girlfriend ka na bago ka magbirthday ulit". Hehe. Yun na lang siguro ang wish ko ngayon lol. Di naman ako nagmamadali. Pero wth, antagal naman...